2013年2月22日 星期五

尋尋覓覓



面具  堂前燕
我戴著面具進入試場,同學們對我行注目禮,主考官面上的神色告訴我,他不歡迎我來當搞屎棍。
『可唔可以除低面具?』
『每個人都有一個面具,咁點解你唔除?』
我得到的是主考官嚴厲的叱責,還有同學們的譏笑:嘩,藝術家喎。
我成為學校裡的笑柄,有人說我搏出位,有人說我痴線,但沒有人去思考為甚麼我會這樣做,他們只當我是龍心一樣的attention whore。
我看著他們幾十人堆在一起拍大頭照,縱使在拍照一瞬間他們好像親密無間,但平日卻不見得他們有多投契,所謂的友情只供拍照食飯。無故來電會被視會唐突係咪有特別事搵我,而不是很久沒見我想念你,一年一次的飯聚像例行公事,這位要返工,那個約左人,沒有birthday reminder不會記得我何時生日但偏偏我會在你Facebook上留句happy birthday的comment以及幾個讚好,只不過沒有Facebook也許我會連你是誰都不記得,一句hi一句bye就是最大限度拜託你無咩事唔該唔好煩住我。
每個人都在用虛偽來維持一種虛假的和諧,盡力避免戳破其實我地唔係好熟這個事實。他們說話有禮,但言語間卻在隱藏自己的想法,我分不清他們是不想公開和我發生衝突,抑或只是純粹覺得我很煩我無咁多時間曬係你身上。
而當知道我Facebook上只有幾十人的時候,他們每個人看著我的眼神都像看著甚麼奇珍異獸。我會詢問Facebook上add我的人是誰,而我得到的是回罵――add咪add囉,唔add咪算,add個Facebook都問長問短,痴線。我相信當Facebook你是online的時候,我是可以找你的,然後像朋友一樣聊天,而不是得到你係邊個的回覆。
原諒我對Friend,朋友,這個字還有一點的尊重和珍惜。不像很多人,對不起,我拒絕根本不friend的人去冒充我的friend,我的朋友也不能被隨意刪減增加。
然後我得到的評價是幼稚、不成熟,我是那個說國王身上沒穿衣服的孩子。
金錢,時間,心思,感情,我們花費太多我們沒有的東西,去取悅我們根本不喜歡的人。
所謂成熟,不過是虛偽。



呢個可能係我鄉愁既原因。真係頂唔順呢種「你坦誠比人罵,你假仁就備受傳頌」既生活。旁人勸我話人際關係需要經營甚至量化,迷失在半真半假既自我,希望可以搵到一個蘇眉不枉此生,我卻發現再搵唔番果個天真率直既自己。

尋晚執左一晚 Soc 房,原來唔到要做野果日你都唔會發覺自己係幾咁孤軍作戰。打開手機聯絡人,識既熟既已經唔多, Chur 得既已經 Chur 緊,唔 Chur 得既一早訓左。好開心有庄員諗住辭工專心做庄務,起碼由「吓」到「諗住辭工」都係一種進步。

世界好亂,屋企好亂,我好亂。老實講,我需要一個樹窿。負能量好似經濟泡沫咁,係咁脹,係咁脹。如果唔久唔久做下宏觀調控,我真係想像唔到爆果下有幾大鑊。唉,如果我容易尐信人就好啦,孤軍作戰既感覺真係有尐難受。

其實我都覺得自己好矛盾,點解我唔將呢個 Blog 既野直接 post 去 FB 呢?開一個 Public Blog 既用義到底係咩?其實我都唔知,我剩係知我每一次打完都會好過少少,或者呢個就係我既樹窿啩。至於點解要校做 Public?可能我心底都希望有人可以無意中發掘到我既心事,不過我知呢個係妄想黎架啦。唉,2013年繼續捱吧!

//好想插上翅膀飛 離開馬戲團 可突然發現 我是小丑的裝扮//