同行者

今日晏畫搭車，打比曾嘉勇，佢話只要google一下「曾禮健」就可以搵到呢個blog既文章。
跟住我番到屋企自己google下，睇番尐文章︰咦，文筆唔錯喎！

猶記得當年自己開呢個blog，是為了抒發自己不安的情緒。
其實之所以唔寫係xanga而寫係呢個blog，到底係想唔想有人睇到呢？

當時好幼稚，好多小事都當係大事，現在的我可能都好幼稚，依然經常鑽牛角尖。

甚至早前去台灣都會發下老脾，搏下重視。

不安，好多時都係出於着緊同重視，太怕失去。

擔心失去左，就再搵唔番。

尤其是好多人都話我知，一生人中最好的朋友，總是中學的「死黨」。

伍嬿霖有次都同我講過︰朋友既野，開心咪一齊囉，駛乜諗咁多喎。

講係咁講姐，幾多人捨得離別，又幾多人不對隔膜而感到無奈？

幸運的是，我亦好容易因為朋友的一言一行而滿足。

一個電話，一個笑話，一個邀請，在我而言都係溫暖非常，或者笑點低都係一種優點掛。

突然間又中六，分別既一年。

唔知點解，呢年好似過得等別慢。

可能係太多假放，加上我又懶，等待的時間多了所致。
每日例行既skype，依家都漸漸變得冷清了。

以前一齊食飯、打機、吹水、睇戲、打波，隊啤都唔知會唔會重現，
更遑論係一齊去旅行、搭飛機了。

得閒既話可能仲會係Facebook吹下水，寒喧一兩句。

六年風風雨雨，離離合合，係依家睇黎，不過「滄海一聲笑」。
當初年少氣盛、血氣方剛，為左少少事，喊交嘈交甚至絕交，為乜呢？到頭來咪又係唔捨得。

不過，誰又會珍惜當你還擁有？

諗住當初小六又唔係幾開心，諗住升中新環境新希望啦，點知都係衰左三年。

中一傻傻更更，被人恥笑，splendid isolate；

中二睇火影學做人，太過執着，太過自我中心既失敗經歷；

中三的小學雞翻臉鬧劇，再加個splendid isolate；

中四的新環境被hack的不安；

中五的新生、巧遇和適應；

中六有學業家庭麻煩事、峰迴路轉的旅行故事，以及升學的徬惶不安、離別的依依不捨。

諗番轉頭，真係一半樂事，一半令人流淚，有着各種叫人心醉的回憶和刻骨銘心的教訓。

感謝例子王教我提早適應社會，感謝小勇將問題變得簡單，感謝小成幫我建立自信，感謝好多好多人的容忍，感謝果尐唔知借過幾多次錢俾我食飯的兄弟，感謝果尐成日幫我執手尾既同學。

總結︰先苦後甜。

十年後既大家會係點？十分期待。

1’ 幾多對持續愛到幾多歲？

2’ 仍然自由自我，永遠高唱我歌，走遍千里？

3’ 埋葬昨天理想，投身今天戰場，錯愛錢幣肖像？